Propozohet që këshillat e prindërve të planifikojnë, të administrojnë vetë dhe të publikojnë kontributet vullnetare, me transparencë të plotë.
Gjatë vitit të kaluar Këshilli analizoi veprimtarinë e këshillave të prindërve në shkollat publike të arsimit parauniversitar dhe vuri re se në shumë shkolla të Tiranës nuk mblidhen kontribute apo donacione nga prindërit. Mungesa e tyre kufizon ndjeshëm aktivitetin e këshillave dhe ndihmën që komuniteti i prindërve mund të japë në shkollë.
Analiza identifikoi tre probleme kryesore: mospasja e qasjes në administrimin e fondeve të mbledhura nga vetë prindërit, të cilat shpesh administrohen nga drejtuesit e shkollës; mungesa e planifikimit financiar dhe e koordinimit me drejtorinë e shkollës; dhe mungesa e transparencës e e llogaridhënies në shpenzimin e kontributeve, që ka sjellë mosbesim dhe rezistencë ndaj kontributeve vullnetare.
Zgjidhja e propozuar bazohet në tre parime:
- Planifikim: në fillim të vitit shkollor kryetari, këshilli i prindërve dhe drejtuesit e shkollës ndërtojnë "Planin Vjetor të Këshillit të Prindërve", me aktivitetet, ndihmën për infrastrukturën dhe kostot përkatëse, i cili miratohet me shumicë të thjeshtë.
- Vetadministrim: kontributet dhe donacionet vullnetare të prindërve mblidhen dhe administrohen nga vetë këshilli i prindërve të shkollës, në funksion të planit vjetor.
- Transparencë dhe llogaridhënie: mbahet një libër thesari, sekretari për thesarin paraqet çdo semestër pasqyrën e të ardhurave dhe shpenzimeve, dhe në fillim e në fund të vitit shkollor këshilli publikon një tabelë përmbledhëse për prindërit.
Për zbatimin e këtyre rekomandimeve Këshilli kërkon ndryshime në Urdhrin nr. 31, datë 28.1.2020, duke propozuar nene 91/1 dhe 91/2, dhe shprehet i gatshëm të organizojë trajnim për kryetarët e këshillave, si dhe të japë modelet e dokumenteve. Rekomandimet përqendrohen vetëm te kontributet dhe donacionet e mbledhura nga këshillat e prindërve, jo te fondet e shkollës.